Negativepress

( نسمع في هذه الأثناء صوت صرير باب قديم وضخم , يفتح فتدخل الإضاءة .. يندفع الممثلون ويتوزعون في أرجاء المنصة وهو يقومون بتمثيل حالة النوم .. يعود صرير الباب , ومن ثم تختفي الإضاءة ... صمت قصير ... ترقب ... )
" ترفع رأسها , تتفحص المكان " هيه يا جماعة , راح .. راح .. ( ينهض الجميع , ويسود جوٌ من اللعب ) ..
انظروا .. " يبدأ بالسير مستعرضاً نفسه , ويقلد فتاة عارضة الأزياء " احذروا مين أنا ؟
مين يعني ؟
سجين ...
سجين باليد أحسن من عشرة بين الجمهور ...
( يدخل الممثل ( 2 ) والممثلة ( 3 ) في نقاش حاد أشبه بالصراخ , تقترب منهما الممثلة ( 2 ) وتمسكهما من ياقتيهما , فيصمتان .. )
ما الذي يجري هنا ؟
نمثل مسرحية !
أتسمون هذه مسرحية ؟ تسرقون أموال الناس ؟ هذا مخالف للقانون " تكبلهما بقيد واحد وتلتفت للجمهور غامزة " نقتل سجينين بحجر واحد ... ( ممثل ( 3 ) يمثل حالة رجل عجوز ضئيل الجسم , يزحف محاولاً الهروب والانسحاب دون أن ينتبه إليه أحد ) هيه أنت أيها العجوز , إلى أن تظن نفسك ذاهب , يا رجل أنت لا تيأس أبداً ..
لقد دفعت نقوداً لحضور هذه المسرحية , لكنها لم تعجبني , لذا قررت الرحيل ..
أتظنني غبية أيها العجوز ؟ " تعتقله , وتضعه بجانب ممثل ( 2 ) وممثلة ( 3 ) , ومن ثم تقود الجميع كالراعي وقطيعه باتجاه الجمهور " السجناء على أشكالها تقع .." تنظر إليهم " لن تستطيعوا خداعي , فأنتم لستم ممثلين , أنتم إرهابيون ..
ومن أخبرك بذلك ؟
أحد السجناء الصغار ..
( تتبدل الإضاءة ببطء شديد , يبدو الممثلون وكأنهم تخلوا عن أدوراهم .. صمت قصير ..)
ما الذي تفعلونه ؟
نقتل الوقت .. لدي حياة بأكملها لأفعل ذلك ..
ننتظر , فقط ننتظر ..
وما الذي تنتظرونه ؟
ننتظر فرصتنا ...
انظروا " يشير إلى الجمهور " يوجد العديد من الناس الذين دفعوا نقوداً ليروا ماذا يحدث هنا
" مقاطعاً) لكننا سوف نريهم ما يحدث لهم في الخارج ..
وتحت سمعهم وأبصارهم ..
وهل هذا يكفي ؟
أو تظن أن عليهم أن يعرفوا ماذا يحدث هنا ؟
نحن جميعاً سجناء , ونشترك بإطلاق الرصاص على أحلامنا , جميعنا نقتل أحلامنا ...
( تعود المرأة العجوز وهي تجرُّ عكازها الغليظ الطويل , تسير ببطء أكبر من المرتين السابقتين , تخفت الإضاءة إلى درجة يظهر فيها الممثلون وكأنهم خيالات أشباح تتحرك فوق المنصة , وهم يرددون العبارات التالية .. )
لا فائدة ...
واهمون ...
فلنحاول ...
لابد من الخروج .. .
سنبقى سجناء ...
لنفعل شيئاً ...
لنعترف بالهزيمة ...
( يقولون هذه الكلمات بتواترات صوتية متفاوتة بشكل الفوضى المنظمة , فجأة يقطع هذا الترتيل صراخ ...)
ولك خلص " يتوقف الجميع وينظرون إليها بدهشة , وقد عادوا إلى شخصياتهم الحقيقية , تضاء المنصة , الممثلة ( 2 ) تنظر إليهم وقد ملأت وجهها أمارات الغضب والاحتجاج , وكأن ما حدث على المنصة قد لامسها ) خلص مليت , حاجة بقى نضحك على حالنا , بدي أفهم نحنا شو عم نعمل ؟ آه ؟!؟! في حدا منكم قادر يجاوبني ؟ .. الله يلعن الساعة يلي وافقت اشتغل فيها معكون ..
طولي بالك شوي , فهمينا شو صار ؟

( تقترب الممثلة ( 1 ) من الممثلة ( 2 ) في محاولة للتخفيف عنها , تقف بجانبها وقد أمسكت بيدها .. )
" منزعجاً " قتلتي حالك لتشتغلي معنا ..
مظبوط , بس ما كنت مفكرا الوضع هيك !
اهدي شوي , خلص هانت ..
لأيمت , عم قلكون حاجة نضحك على حالنا , ولك مين مفكر فينا ؟
العرض باقيلو يومين , والعالم ناطرتنا لتشوفو
" تضحك , وتقول ساخرة " العالم ناطر ليشوف العرض ؟!!
" بجدية " إيه العالم ناطرين ليشوفوا العرض ...
بصراحة وأنا حاسّة حالي ماعاد فيني أتحمل أكتر من هيك , الوضع عم يتعقد كتير ..
يا جماعة أهدوا شوي , وبلا هالإنفعال , خلونا نمضي هالعرض على خير , بعدين , الوضع مانو جديد عليكون , منشان هيك , خلونا نعمل شي جديد , خلونا نحتفل عن جد بيوم المسرح على طريقتنا ..
نحتفل بشو ؟
بعيد المسرح ! شو نسيانين أنو عرضنا ضمن احتفالية يوم المسرح العالمي ؟
لأ ما نسينا , بس من كل عقلك مفكر حالك عم تحتفل ؟
" بجدية " طبعاً ..
" تضحك " هلق هالكام كلمة يلي كتبون المؤلف وبيجوز يكون سارقون من شي محل , وإلا يلي عم نشتغلوا مع المخرج العبقري هادا اسمو احتفال ؟
كأني أول مرة بتعرف عليكون ! ولك شو صرلكون , جنيتو , بعدين ليش ما حكيتوا هيك من الأول , مو هلق قبل العرض بيومين .. !!!
" محاولاً امتصاص الموقف " يا جماعة نحنا عم نعمل يلي فينا عليه , وخلص ..
أنا خلص , بطلت , ماعاد رح اضحك على حالي , هه , قال مسرح قال , منشان شو ؟ ومنشان مين ؟ ولك روحوا شوفوا المسارح التجارية , شوفوا قديش فيها جمهور , مع أنو سعر البطاقة بيطلع ربع راتبي آخر الشهر .. ونحنا هون متل المجانين " بسخرية " بروفات طاولة , وضغط , وعقد نفسية , وشعارات المسرح الجاد , ومنتعصور , ومدري شو , وكلو عالفاضي.
أنت عم تحكي هيك ؟
يا أخي معها حق , المسرح مات بهالبلد ..
شو يعني , منترك الساحة ومننسحب وإلا ...
" مقاطعاً " تفضل اعطينا حلّ ..
حلّ لشو ؟ أصلاً أنا عم حاول اشتغل منشان ما انجر للمشكلة واقعد نق واشكي ..
ولك حاجة تبيعنا حكي , وحاجة تستغبينا , وكأنوا ما حدا بيعرف غيرك .. في مشكلة كبيرة , والغلط كل يوم عم يكبر ..
ولك فهموني , شو يلي بدكون ياه ؟ ووين الغلط ؟
" تنفجر بوجهه " أجورنا التافهة ؛ مو غلط ؟ ...
الجمهور يلي ما بيهتم مو غلط ؟ ...
الصحفيين والنقاد ..
" مقاطعاً " وشبون كمان الصحفيين والنقاد ؟
لااا هيك تخنتها كتير , الظاهر أنك عايش بالخسّة ..
" مندهشاً " أنا ؟ !!
إيه يا سيدي أنت , اتطلع منيح حولك , هي نحنا أكبر مثال , منشتغل أكتر من شهرين أو تلات شهور بروفات وبأسوأ الظروف , بتنحرق أعصابنا ودمنا , وبالآخر بيجيك واحد منون وحامل تحت باطو وجهة نظر جاهزة وقديمة , وبيطجنا فيها , وواحد تاني لازم نفصلوا العرض على قياسوا وإلا بيقول عنو عرض ضبابي .. لازم تنتبه منيح منشان ما تكون مغفل ..
حاسس أنكون صرتو ضدي ..
لأ , مو ضدك , بس أنت عم تحلم زيادة عن اللزوم , ولازم تعرف أنو لولاك ماكنا اشتغلنا
وين كان هالحكي من زمان ؟
هالحكي مو جديد , والمشكلة أكبر مني ومنك , انتبه منيح ,المشكلة كلها محسوبيات , وأجور تافهة , ونصوص مسروقة أو مترجمة , المشكلة بالإدارة والإنتاج ... ,و أنا قررت إني على الأقل عبّر عن موقفي ..
المسرح ما واقف عليكي .. بيجي غيرك بياخد محلك وبأدنى الشروط ,..
أنا عليي من حالي ..
" خائفاً " ايه شو يعني ؟ ما عم أفهم , شو بدكون هلق ؟ مو حابين تكملوا المسرحية ؟
ولك لمين بدنا نمثل ؟
( باستهزاء , وكأنه يقلد أحد ) للجمهور ...
الجمهور بطّل يجي عالمسرح من وراكون ...
المسرح بيروح لعندو .. ( في هذه الأثناء تقوم الممثلة ( 2 ) بأداء حركات مليئة بالسخرية ) ..
قريب .. قريب .. يا الله لحق محلات , بلش العرض , قريب ..
( تتابع معها اللعبة ) كان يا ما كان , كان في مجموعة من المجانين , حاملين على كتافون أحلام كبيرررررررة.. ( يقاطعها ممثل ( 2 ) ويقوم أيضاً بحركات تهريجية , وهو يخاطب جمهوراً مفترضاً ) ..
مبسوط يا أستاذ ؟ مبسوطة يا آنسة ؟ على فكرة نحنا كتير موهوبين ... وحياة الله موهوبين ( يضحك الجميع , يلتفت إليهم ) عم تضحكوا؟! فرحانين ؟
رد يا أستاذ , ردي يا آنسة ( عفواً ) يا مدام ... أنت يلي كنت رايحة عالسوق تجيبي تنورة جديدة , وما عندك وقت تجي عالمسرح , يا الله وفرنا عليكي حق التنورة .. بعدين الدنيا برد والله بكير ( تقوم بالإيماء دلالة على قصر طول التنورة ) ..
وأنت يا أستاذ أكيد رايح على دوامك التاني بعد الضهر , وأكيد بدك ترجع عالبيت تعبان وتحط راسك وتنام منشان تفيق الصبح وتلحق دوامك الأول ..
شايفين ( إلى أعضاء الفرقة ) هداك الشب يلي قاعد آخر مقعد , ما بيشبهو لمهند بمسلسل نور ؟ كنت كل يوم شوفو عند الكورنيش الجنوبي , وهلق بعد ما عمروا الحيط الكبير ما عدت شفتو ...( كل ما يقوم به أعضاء الفرقة من أجل أن يقوموا باستفزاز ممثل ( 4 ) , ولكنهم هذه المرة ينجحون بذلك , فينفعل ممثل( 4 ) ويصرخ بوجههم )
حاجة مسخرة , شو هاد؟ شو عم يصير ؟